Ўзбекистон Саудия Арабистони ва Франция компаниялари билан биргаликда хавфли саноат чиқиндиларини бошқариш соҳасида лойиҳани амалга оширишни режалаштирмоқда, деб хабар беради Экология, атроф-муҳитни муҳофаза қилиш ва иқлим ўзгариши вазирлиги матбуот хизмати.

Бу ҳақдаги келишувни экология вазири ўринбосари Жусипбек Казбеков, Висион Интернатионал Инвестмент (Саудия Арабистони) компаниясининг ривожланиш бўйича директори Капил Лалвани ва Суэз Интернатионал (Франция) компаниясининг Европа ва Марказий Осиё бўйича минтақавий директори Пол Бурдиён имзолади.

Лойиҳа қиймати 78 млн долларга баҳоланмоқда. У уч босқичда амалга оширилади:

Биринчи босқичда чиқиндиларни барқарорлаштириш ва полигонларга жойлаштириш мажмуалари ҳамда минтақавий узатиш станцияларини яратилади;

иккинчи босқичда чиқиндидан ёқилғи олиш (РДФ – Refuse-derived fuel) ускунаси, ёқиш иншоотлари ва иссиқлик билан ишлов бериш корхонасининг муҳандислик олди лойиҳасини ишлаб чиқиш ва тажриба асосида синовдан ўтказилади;

учинчи босқичда эса тўлиқ миқёсдаги чиқиндидан ёқилғи олиш, иссиқлик билан ишлов бериш иншоотини барпо этиш ва ишга тушириш мақсад қилинган.

Франциянинг Suez International хорижий компанияси сув ресурслари ва чиқиндиларни, шу жумладан хавфли чиқиндиларни бошқаришга ихтисослашган бўлиб, Европа, Осиё-Тинч океани минтақаси, АҚШ, Африка ва Яқин Шарқда фаолият юритади.

Vision International Investment Company – 96 миллиард долларга яқин активларни бошқарадиган йирик инвестиция холдинги. Фаолиятнинг асосий йўналишлари энергетика, инфратузилма, коммунал хизматлар, сув ресурсларини бошқариш, электр энергияси ишлаб чиқариш, консалтинг ва давлат-хусусий шериклик лойиҳаларини қамраб олади.