Бухорода янги Исломий илмий-тадқиқот маркази – Баҳоуддин Нақшбанд илмий-тадқиқот маркази ишга туширилди.

Хабарга кўра, марказ ислом динининг буюк арбоби, Нақшбандия тариқатининг асосчиси Баҳоуддин Нақшбанд зиёратгоҳи ҳудудида ташкил этилган.

Марказ директори этиб эса «Чор Бакр» масжиди имом-хатиби, Исломшунослик фанлари бўйича фан доктори, дотсент Азизхўжа Хайруллоевич Иноятов тайинланган.

Марказ фаолиятидан кўзлаган мақсад:

▪️ Баҳоуддин Нақшбанд ва нақшбандийлик тариқати алломаларининг юксак инсонпарварлик ғояларини илмий асосда ўрганиш;

▪️ тасаввуф таълимоти тарихи ва унинг бугунги кундаги аҳамиятини илмий тадқиқ этиш;

▪️ "Етти пир" алломалари ва азиз авлиёларнинг бой илмий-маънавий меросини халқаро майдонда кенг тарғиб қилиш;

▪️ нақшбандийлик таълимотининг эзгу ғояларини тадқиқ этиш учун илмий-назарий ва услубий масалаларга бағишланган анжуман, конференсия, кўргазма, семинар-тренинг, танловлар ҳамда бошқа маданий-маърифий тадбирларни ташкил этиш;

▪️ тасаввуф таълимотининг илмий асосланган ғояларини тарғиб қилиш;

▪️ сохта тариқатчиликнинг олдини олиш бўйича тавсиялар ишлаб чиқиш.

Маълумот учун, Нақшбандия тариқати дунёда энг кўп ёйилган тариқатлардан бири бўлиб, миллионлаб мўмин-мусулмонлар томонидан амал қилинади. Шу боис, Баҳоуддин Нақшбанд зиёратгоҳига ҳар йили минглаб зиёратчилар ташриф буюради.