Олий Мажлис Сенатининг еттинчи ялпи мажлисида Сенат раиси Танзила Норбоева божхоначига экологик сертификат масаласи юзасидан савол бериб, унга конституцион нормани эслатди.

Норбоева гибрид электромобиллардан экология сертификати талаб қилинаётгани тўғрисида савол билан божхона вакилига юзланди. Божхоначи гибрид электромобиллардан божхона тарафидан экология сертификати талаб қилинмаётганини айтди. Унга жавобан Танзила Норбоева сенатор сўрови юборилгунича пул олиб юрилганини таъкидлади.

Божхона вакили қайд этишича, у маблағлар Экология қўмитасига йўналтирилган ва бу масалада янада аниқлик киритиб олинади.

Танзила Норбоева Норматив ҳуқуқий ҳужжатлар тўғрисидаги қонуннинг 18-моддасини эслатиб, инсон билан давлат органларининг ўзаро муносабатларида юзага келадиган қонунчиликдаги барча зиддиятлар ва ноаниқликлар инсон фойдасига талқин этилишини таъкидлади.