Netflix компанияси Амир Темур ҳақидаги кинокартинанинг тасвирга олиш ишларини тугатди. Бу ҳақда Подробно.уз нашри хабар берди.

2022 йил якунида тайёрлана бошланган "Темурлан: сўнгги жаҳонгирнинг юксалиши" кинотасмаси Амир Темур ҳаётига бағишланган. Фильмни суратга олиш ишлари Ўзбекистон ва Қозоғистонда бўлиб ўтган.

"Бизнинг фильм Амир Темур ҳокимият тепасига келишининг эпик тарихи ҳамда у қолдирган мерос ҳақида ҳикоя қилади. Ишлаб чиқаришнинг асоси Ўзбекистон бўлди. Биз минтақадаги энг муҳим тарихий шахслардан бирининг кинематографик тасвирини у яшаган ва жанг қилган жойларда гавдалантирдик. Бу суратга олиш учун жуда қадрли", – дейди лойиҳа муаллифларидан бири.

Суратга олиш гуруҳига Ўзбекистон, Қозоғистон ва АҚШ мутахассислари жалб этилган. Режиссёр Жейкоб Шварц, сценарий муаллифи Метю Грин. Амир Темур ролини Кристиан Мортенсен ўйнаган. Амир Ҳусайннинг рақибини Маҳеш Жаду, Алжайнинг рафиқасини эса ўзбек актрисаси Юлдуз Ражабова ижро этган.

Қайд этилишича, каскадёрлар гуруҳини афсонавий Номад Стунтс жамоаси бошқарган. Улар ёрдамида отлиқлар ҳужумлари ва от жангларининг эпик эпизодларини жонлантиришга эришилган.

"Ўзбекистонлик олимлар билан яқиндан ҳамкорлик қилиб, жамоамиз Марказий Осиёнинг улуғворлигини – асл декорациялар, тарихий жиҳатдан аниқ либослар ва Темур салтанатининг моҳиятини акс эттирувчи ажойиб кинематографияни синчковлик билан қайта яратди", – дейди ижодий гуруҳ.

Фильм суратга олиш ишлари ўтган йилнинг кузида якунига етган ва ҳозир у постпродакшен босқичида. Фильм премьераси жорий йил ёз фаслининг охирларида ўтказилиши тахмин қилинмоқда.