АҚШ президенти Дональд Трамп "Интернетдан ўчириш тўғрисидаги қонун"ни имзолади. Мазкур қонун айниқса, аёллар ва болаларга нисбатан жинсий эксплуатация учун сунъий интеллектдан фойдаланишдан қайтаради. Қонун лойиҳасини унинг рафиқаси Мелания Трамп илгари сурган.

Трамп Оқ уйда бўлиб ўтган қонун имзолаш маросимида таъкидлашида, сунъий интеллект технологиялари ривожлангани сайин интернетда жабрланувчининг хабардорлиги ва розилигисиз "даҳшатли" суратлар тарқала бошлади. Трамп шунингдек, бу мазкур сферадаги биринчи қонун саналишини қайд этиб ўтди.

"Генератив сунъий интеллект технологиялари ривожлангани сайин сон-саноқсиз аёл ва болалар дипфейк қурбонига айланди. Уларнинг хабардорлигисиз одобсиз суратлари тарқалди. Бу нотўғри ва даҳшатли. Бугун биз юқоридагилар қонунга зид эканини расман эълон қиламиз" – дейди Трамп.

У шунингдек, қонунни бузганлар 3 йилгача озодликдан маҳрум қилинишидан огоҳлантирди. Шу каби материалларни тарқатувчи онлайн платформалар бўлса тегишли контентларини зудлик билан (48 соат ичида) ўчириши шарт.

"Биз интернетдаги онлайн жинсий эксплуатацияга тоқат қилмаймиз. Бу каби ҳолатлар мисли кўрилмаган миқёсга етиб, вазият ёмонлашишда давом этмоқда. Ва мен мазкур қонун жараённи тўхтатишга ёрдам беришидан умид қиламан" – қўшимча қилди Трамп.

Трамп шунингдек, қонун Конгрессда – 99 овоз билан Сенатда, 408 та овоз билан вакиллик Палаталарида қўллаб-қувватланганига эътибор қаратди.

"Биринчи хоним Конгрессда партия қолипларидан ташқарида ҳам ишлаш мумкинлигини кўрсатди. Бу ақл бовар қилмайдиган нарса. Афсуски, барча қонунлар ҳам бунчалик қўллаб-қувватланмайди" – дейди Президент.

Қонун лойиҳаси Конгрессга Мелания Трамп ташаббуси билан Техас Республикачи партияси сенатори Тед Круз ва Миннесота штатидан демократ Эми Клобушар томонидан киритилган. У биринчи марта феврал ойида Сенат томонидан қабул қилиниб, кейин Палата томонидан тасдиқланган.

Ҳужжат онлайн платформаларда Сунъий интеллект томонидан ишланган, реал инсонлар образидан уларнинг розилигисиз фойдаланилган порнографик расм ва видеолар жойлашни тақиқлайди.