2025 йил 17 апрелда қабул қилинган қонун билан лотерея, букмекерлик ва интернет орқали таваккалчиликка асосланган ўйинлар фаолияти лицензия асосида амалга ошириладиган фаолиятлар қаторига киритилди. Бу ҳақда Адлия вазирлиги хабар қилди.

Мазкур ўзгартиш Ўзбекистон Республикасининг айрим қонун ҳужжатларига ўзгартириш ва қўшимчалар киритишни назарда тутувчи қонун [ЎРҚ-1057-сон] билан жорий этилди.

Ушбу қонун билан шунингдек, Истиқболли лойиҳалар миллий агентлигига капитал бозори, суғурта бозори ва лотереяларни тартибга солиш бўйича ваколатлар юклатилди.

Бундан ташқари, «Суғурта фаолияти тўғрисида»ги қонунга ҳам ўзгартиш киритилиб, суғурта ташкилотлари раҳбарияти ва мулкдорларининг ишчанлик обрўсига қўйиладиган талаблар белгиланди.

Қонун расмий эълон қилинган кундан эътиборан кучга киради.

Сенат қонунни 21 февралда маъқуллаган эди. Ўшанда ўзгартиришлар онлайн қимор ўйинларини тартибга солиш, қимор ўйинларига қарам фуқароларнинг иштирокини чеклаш механизмларини ҳамда ноқонуний хорижий хизматлардан фойдаланишни тақиқлашни назарда тутиши қайд этилганди.

Декабрь ойида ҳукумат Ўзбекистонда қимор ўйинлари, лотерея ва букмекерлик фаолиятини ташкил этиш учун талаб ва шартларни тасдиқлаганди. Ташкилотчилар учун лицензия муддати 5 йил этиб белгиланди, уларнинг устав капитали камида 56,25 млрд сўм бўлиши шарт. Шунингдек, бир қатор тақиқ ва чекловлар ҳам қабул қилинди.

Эслатиб ўтамиз, 2024 йил апрелдаги президент фармони билан Ўзбекистонда 2025 йил 1 январдан таваккалчиликка асосланган ўйинларни ташкил этиш ва букмекерлик фаолиятини амалга оширишга рухсат берилган.