Венгрия Конституциясига мамлакат Парламенти томонидан маъқуллаб киритилган ўзгартиришларга кўра, "инсон фақат аёл ёки эркак бўлиши керак". Бу ҳақда Index нашри хабар берган.

Венгрия парламенти 14 апрель куни мамлакат Конституциясига инсон фақат эркак ё аёллигини назарда тутувчи ўзгартириш киритилишини ёқлаб овоз берган. Депутатлар қўллаб-қувватлаган қонунчиликдаги яна бир ўзгариш қатор кузатувчилар фикрича, прайд тадбирларини ўтказишни чеклашга қаратилган.

"Венгрия аёл ва эркак ўртасидаги ихтиёрий иттифоқ саналувчи миллат мавжудлигининг асоси бўлган оила институтини ҳимоя қилади. Оила никоҳ, ота-она ва фарзандлар ўртасидаги муносабатларга асосланади. Инсон ёки эркак бўлади, ёки аёл. Ота – эркак, она – аёл" – дея Озодлик радиоси Венгрия қонунчилигига киритилган ўзгаришга бўлган муносабатлардан иқтибос келтирган.

Қайд этилишича, ушбу ўзгаришларни мамлакат парламентининг 140 нафар аъзоси қўллаган бўлса, 21 нафар депутат унга қарши чиққан. Бундан ташқари, ушбу масалани Венргия бош вазири Виктор Орбан ва унинг ФИДЕС партияси ҳам қўллаб-қувватлаган.