Норматив-ҳуқуқий ҳужжатлар лойиҳалари муҳокамаси порталига “Мирзо Улуғбек номидаги Ўзбекистон миллий университети ҳузурида Назарий физика институтини ташкил этиш тўғрисида”ги ҳукумат қарори лойиҳаси муҳокамага қўйилди.

Унга кўра:

Институт тузилмасида ходимларнинг тасдиқланган умумий чекланган сони 20 нафарни ташкил этади;

Институт юридик шахс мақомига эга бўлган илмий-тадқиқот ташкилоти ҳисобланади.

Қуйидаги вазифалар институтнинг асосий йўналишлари этиб белгиланади:

Назарий физика соҳасининг долзарб муаммоларини ўрганиш ва фундаментал, амалий, инновацион ҳамда халқаро илмий-тадқиқот лойиҳаларда иштирок этиш;

Квант майдон назарияси, субатом физикаси, ночизиқли физика, гравитацион майдон ва квант тармоқлар бўйича илмий анжуманлар ва семинарлар ташкил этиш;

Ёш олимлар учун замонавий назарий физика йўналишлари бўйича илмий-ўқув материаллар тайёрлаш;

Физика соҳасида таълим ва илмий фаолият интеграциясини кучайтириш, талабалар ва докторантларни тадқиқот ишларига жалб этиш;

Иқтидорли талабаларни назарий физика бўйича тайёрлашда олий таълим муассасалари билан ҳамкорликни ривожлантириш;

Халқаро илмий ҳамкорликни кенгайтириш ва нуфузли тадқиқот марказлари билан алоқаларни йўлга қўйиш;

Ривожланган давлатлар тажрибаси асосида таҳлилий маълумотлар тайёрлаш;

Илмий лойиҳалар учун маҳаллий ва халқаро мутахассисларни жалб этиш;

Тадқиқотлар кўламини кенгайтириш ва назарий физика бўйича халқаро илмий журналлардаги нашрлар сонини ошириш.

Институтга қуйидаги ҳуқуқлар берилади:

Бошқа илмий ташкилотлар, жамғармалар, ўқув муассасалари, шу жумладан, халқаро ва хорижий ташкилотлар билан биргаликда илмий тадқиқотлар ўтказиш учун шартномалар тузиш;

Илмий тадқиқотлар соҳасида зарур ахборотларни, статистик, таҳлилий ва бошқа маълумотларни давлат органлари ва ташкилотларидан сўраш;

Университет зарур мебель, компьютер техникаси ва бошқа моддий воситалар билан таъминланади.

Муҳокамаларда фаол иштирок этиб, таклифларингизни regulation.adliya.uz платформаси орқали қолдиришингиз мумкин.