ChatGPT ишлаб чиқувчиси бўлган Американинг OpenAI сунъий интеллект компанияси Ўзбекистонда солиқ тўловчиси сифатида рўйхатдан ўтди. Бу ҳақда Spot хабар берди.

Кеча, 8 апрель куни компания Солиқ қўмитасининг электрон хизмат етказиб берувчиларнинг махсус платформасида рўйхатга олинган. Шунингдек, АҚШнинг DigitalOcean булутли хизматлар провайдери ҳам электрон хизматлар етказиб берувчиси сифатида қўмитада ҳисобга олинган.

Шу тариқа, Ўзбекистонда рўйхатдан ўтган хорижий интернет-компаниялари сони 67 тага етди. 2025 йил бошидан жами 7 та компания солиқ тўловчиси сифатида рўйхатдан ўтган.

Маълумот ўрнида, 2023 йилнинг ноябрь ойидан бошлаб Ўзбекистонликларга ChatGPT`га рўйхатдан ўтиб, фойдаланиш ҳуқуқи берилган эди.