Ишсизлик нафақаси ишсиз деб эътироф этилган шахсга у иш қидираётган шахс сифатида маҳаллий меҳнат органида рўйхатдан ўтган кундан эътиборан тайинланади.

Қарамоғида учтагача киши бўлган, ўттиз беш ёшга тўлмаган ишсиз эркакка ишсизлик нафақаси у ҳақ тўланадиган жамоат ишларида Ўзбекистон Республикаси Вазирлар Маҳкамаси томонидан белгиланадиган тартибда иштирок этган тақдирда тайинланади.

Ишсиз шахснинг нафақа олиш ҳуқуқи у иш қидираётган шахс сифатида рўйхатдан ўтган пайтдан бошлаб кечи билан ўн биринчи кундан эътиборан кучга киради.

Ишсизлик нафақаси сабаб ва омилга қараб, кўпи билан:

▪️ ишдан ва иш ҳақидан (меҳнат даромадидан) маҳрум бўлган ёки узоқ (бир йилдан ортиқ) танаффусдан кейин меҳнат фаолиятини қайта бошлашга ҳаракат қилаётган шахсга ўн икки ойлик давр мобайнида йигирма олти календарь ҳафта мобайнида;

▪️ илгари ишламаган ва биринчи марта иш қидираётган шахсга эса ўн уч календарь ҳафта мобайнида тўланади.

Талабгор ишсизлик нафақасини олиш даврида иш қидириши ва ҳар икки ҳафтада камида бир марта маҳаллий меҳнат органига ишга ёки касбга тайёрлашга, қайта тайёрлашга, малакасини оширишга йўлланма олиш учун мурожаат қилиши шарт.

Ишсизлик нафақаси ишсиз шахс ҳолатига қараб, турли миқдорларда тўланади. Хусусан, ишдан ва иш ҳақидан сўнгги 12 ой ичида маҳрум бўлганлар аввалги иш жойидаги ўртача ойлик иш ҳақининг 50 фоизи миқдорида нафақа олиши мумкин. Бунда нафақа меҳнатга ҳақ тўлашнинг энг кам миқдоридан (1 миллион 155 минг сўм) кам ёки Ўзбекистондаги ўртача иш ҳақидан ортиқ бўлмайди.

Ишдан ва иш ҳақидан маҳрум бўлган ҳамда бир йилдан ортиқ танаффусдан кейин меҳнат фаолиятини қайта бошлашга ҳаракат қилаётган шахслар меҳнатга ҳақ тўлаш энг кам миқдорининг бир баравари миқдорида (1 миллион 155 минг сўм) нафақа олади.

Илгари ишламаган ва биринчи марта иш қидираётган шахсларга эса меҳнатга ҳақ тўлаш энг кам миқдорининг камида 75 фоизи миқдорида ишсизлик нафақаси тайинланади.