Самарқанд шаҳрида «Марказий Осиё — Европа Иттифоқи» биринчи саммити ўз ишини бошлади.

Тадбирни Ўзбекистон Президенти кириш сўзи билан очиб берган.

Президент ўз нутқи аввалида йиғилиш олдиндан айтиб бўлмайдиган глобал жараёнлар шароитида ўтаётганини таъкидлаган.

«Биз геосиёсий кескинлик, хавфсизлик муаммолари, йирик минтақавий можаролар, барқарор ривожланиш йўлидаги ижтимоий ва иқтисодий таҳдидлар кучайиб бораётганига гувоҳ бўлмоқдамиз. Ҳеч бир ҳудуд бундай мураккаб масалаларни кенг халқаро ҳамкорликсиз, мустақил ҳал эта олмаслиги аниқ», — деган давлат раҳбари.

Шавкат Мирзиёев, шунингдек, Марказий Осиё Европа томонининг халқаро ҳуқуқ принциплари ва нормаларига содиқлигига қўшилишини урғулаган.

«Украина атрофидаги вазиятни тинч йўл билан ҳал этиш бўйича музокаралар жараёни бошланганини олқишлаймиз ва тўлиқ қўллаб-қувватлаймиз», — деган Ўзбекистон етакчиси.

Президент жуда мураккаб масалаларни ҳал қилиш кераклигини тушунишини билдирар экан, олиб борилаётган дипломатик саъй-ҳаракатлар ва сиёсий қарорлардан бошқа муқобили кўринмаётганини маълум қилган.