Ўзбекистон олий ўқув юртлари ва техникумлари дипломларини Германияда тан олиш масаласи 1 апрель куни бўлиб ўтган инвестициялар, саноат ва савдо вазири ўринбосари Шоҳрух Гуламовнинг Германия таълим ва миграция соҳаси мутахассислари делегацияси билан учрашувидаги мавзуларидан бирига айланди. Бу ҳақда ИССВ матбуот хизмати хабар берди.

Хусусан, Ўзбекистон таълим муассасаларини Германия Таълим ва тадқиқот вазирлигининг ушбу мамлакатда хорижий дипломларни тан олишда фойдаланиладиган АНАБИН ахборот базасига киритиш имкониятлари муҳокама қилинди.

Томонлар ўзбек ёшларини илғор технологиялар бўйича ўқитиш ва кейинчалик Германия корхоналарига ишга жойлаштириш, шунингдек, Ўзбекистонда ишлашни режалаштираётган немис мутахассисларига имтиёзлар бериш имкониятларини ҳам кўриб чиқди.

Йиғилишда Германия савдо-саноат палаталари ҳудудий директорлари, шунингдек, GP Günter Papenburg таъсисчи компанияси томонидан ташкил этилган инвестиция компаниялари раҳбарлари иштирок этди.

АНАБИН (Anerkennung und Bewertung ausländischer Bildungsnachweise) — Германия Таълим ва тадқиқот вазирлигининг (BMBF) расмий маълумотлар базаси бўлиб, унда хорижий дипломлар ва таълим муассасаларининг тан олиниши ва баҳоланиши ҳақидаги маълумотлар мавжуд.

Тизим чет эл дипломининг немис таълим стандартларига мос келишини баҳолайди ва немис иш берувчилари, университетлари ва давлат идораларига чет эл фуқароси дипломи тан олиниши ва немис таълими билан солиштириш мумкинлигини тушунишга ёрдам беради.

Унда хорижий таълим муассасалари рўйхати ва уларнинг ҳолати тўғрисидаги маълумотлар келтирилган. Германияда ишлаш ёки ўқишни давом эттириш истагида бўлган чет элликлар учун АНАБИНда ижобий мақом виза, яшаш учун рухсатнома, малакани тасдиқлаш ва ишлашга рухсат олиш учун муҳим шарт.