ЮНEСКОнинг Париждаги бош қароргоҳида Ўзбекистон Республикаси Ҳукумати ва ЮНEСКО ўртасидаги келишув имзоланишига бағишланган тантанали маросим бўлиб ўтди, деб хабар берди Саида Мирзиёева телеграм каналида.

Унга кўра, Самарқанд расман Бош конференциянинг 43-сессияси ўтказиладиган жой сифатида белгиланган.

Мазкур конференция сўнгги 40 йил ичида илк марта Париждан ташқарида бўлиб ўтади.

«Бу ижодий индустриянинг машаққатли меҳнати, халқ дипломатияси ва энг юқори даражадаги келишувлар самарасидир. Бу – жаҳон ҳамжамиятининг мамлакатимиз очиқлиги, ўзига хос анъаналари ва маданий мероси, бой тарихи, мусиқаси, адабиётига катта қизиқиши билан қараётганидан далолат» – дейди Саида Мирзиёева.

Мирзиёева шунингдек, биз маданият ва санъат воситасида мамлакатимизни халқаро майдонда тарғиб этиб, дунё аҳлига янада яқинлашаётганимизни таъкидлаган. Бу алоқалар бевосита иқтисодий натижаларга уланиб, қўшма лойиҳалар ва умумий ғояларга айланаётгани қайд этилган.