14 мартдан пойтахт автобусларида чиптасиз юрганларни жаримага тортиш амалиёти бошланди. Бу ҳақда Транспорт назорати инспекцияси хабар берди.

Хабарингиз бор, Тошкент шаҳри жамоат транспорти автобусларда нақд пулни қабул қилиш амалиётидан тўлиқ воз кечилган. Йўл ҳақи электрон шаклда ёки бир марталик ҚР-чипталар ёрдамида амалга оширилиши зарур.

Ушбу амалиёт моҳияти, қулайлиги ва тежамкорлиги бўйича Транспорт назорати инспекцияси, Тошкент шаҳар жамоат транспортини мониторинг ва назорат қилиш давлат муассасаси ходимлари, шунингдек, ОАВ ва ижтимоий тармоқлар орқали мунтазам равишда тарғибот-ташвиқот ишларини олиб борган.

Йўловчилар орасида тўловларни ўз вақтида амалга ошириб, тизим қулайлигини эътироф этаётганлар билан бирга, йўл ҳақини ҳеч қандай асоссиз тўламай автобусдан тушиб кетаётглар ҳам тез-тез учраб тургани қайд этилган.

Шу каби ҳолатлар юзасидан инспекция ва Тошкент шаҳар жамоат транспортини мониторинг ва назорат қилиш давлат муассасаси ходимлари томонидан Тошкент шаҳридаги автобусларда кучайтирилган рейд тадбирлари бошланган.

Таъкидланишича, йўловчилар йўл ҳақини бир марталик ҚР-чипталар ёрдамида амалга оширишганда сафар давомида ҚР-чипталарни ўзларида сақлаб қолиши ҳамда назоратчи ва инспекторларининг сўровига асосан уларга кўрсатишлари лозим.

Расмий ахборот матнида шунингдек, Маъмурий жавобгарлик тўғрисидаги кодекснинг 144-моддаси 5-бандига асосан йўловчининг шаҳар ичида ва шаҳар атрофига қатнайдиган автобусда чиптасиз юриши базавий ҳисоблаш миқдорининг ўндан бир қисми миқдорида жарима солишга сабаб бўлиши эслатиб ўтилган.