Бугун, 29 март куни Тошкент халқаро аэропортида Москвадан учиб келган самолёт қабул қилиб олинди.

Хабарга кўра, ҳаво кемаси бортида Ўзбекистон Республикаси Ички ишлар вазирлиги ва Соғлиқни сақлаш вазирлиги ходимлари ҳамроҳлигида Россия Федерациясида ота-она қарамоғисиз қолган 11 нафар вояга етмаган ўзбекистонлик бола ҳам бўлган.

«Жараён давомида Ўзбекистоннинг РФдаги элчихонаси болаларни ватанга қайтариш учун зарур бўлган ҳужжатларни тайёрлаш ва расмийлаштириш ишларини ўз вақтида амалга оширди», дейилади хабарда.

Болалар вақтинча Тошкент шаҳар ИИББ қошидаги Вояга етмаганларга ижтимоий-ҳуқуқий ёрдам кўрсатиш марказига жойлаштирилиб, уларнинг 4 нафари «Инсон» ижтимоий хизматлар марказлари томонидан олдиндан тайёрланган ўз оилаларига, 7 нафари эса васийлик ва ҳомийлик тайинланган ҳолда яқин қариндошларига топширилади.

Вояга етмаганларга, шунингдек, ижтимоий ёрдам уларнинг келгусидаги яшаш жойларида ҳам давом эттирилади.