Президентнинг «Муборак Рамазон ҳайитини нишонлаш тўғрисида»ги қарори қабул қилинди.

Унда ёзилишича, жорий йилда Рамазон ҳайитининг биринчи куни 30 март – якшанба кунига тўғри келиши ҳақидаги Ўзбекистон мусулмонлари идорасининг ахбороти маълумот учун қабул қилинган. Шу муносабат билан, мамлакатимизда 2025 йил 30 март куни Рамазон ҳайити байрами сифатида кенг нишонланади.

Таъкидланишича, ишланмайдиган байрам куни ҳисобланувчи Рамазон ҳайитининг биринчи куни 2025 йилда якшанба – дам олиш кунига тўғри келиши сабабли ушбу дам олиш куни 31 март – душанба кунига кўчирилади.

Аммо ишлаб чиқариш-техник ва ташкилий шароитлар (мавжуд узлуксиз ишлаб чиқариш, аҳолига ҳар куни хизмат кўрсатиш, навбатчилик асосида ишлаш ва бошқалар) туфайли ишланмайдиган байрам кунлари тўхтатиб қўйиш мумкин бўлмаган ишларни бажаришда дам олиш кунлари кўчирилмайди.

Шу ҳисобда, шанба куни (29 март) 5 кун ишлайдиганлар учун дам олиш, 6 кун ишлайдиганлар учун эса иш куни ҳисобланади.

Якшанба (30 март) эса Рамазон ҳайити нишонланадиган кун. Душанба (31 март) барча учун кўчирилган дам олиш куни бўлади.