Ўзбекистоннинг Сан-Маринога тайинланган биринчи элчиси Абат Файзуллаев мазкур давлат раҳбарлари – Капитан-регентлар Франческа Чиверкья ва Далибор Риккардига ишонч ёрлиқларини топширди. Бу ҳақда "Дунё" АА хабар берди.

Маросимда Сан-Марино ташқи ишлар вазири Лука Беккари сўзга чиқиб аккредитациядан ўтган элчиларни олқишлади. Вазир Лука Беккари давлатимиз раҳбари ташаббуси билан мамлакатимизда олиб борилаётган иқтисодий ва демократик ислоҳотларни, Ўзбекистон ва Сан-Марино ўртасидаги алоқаларни ривожлантиришга қаратилган саъй-ҳаракатларни, жумладан ушбу мамлакатга биринчи элчининг тайинланишини юқори баҳолади.

Айд этилишича, Ўзбекистоннинг иқлим ва атроф-муҳит билан боғлиқ муаммоларга қарши курашишда ҳамда барқарор ривожланиш йўлида олиб бораётган оқилона сиёсати юксак баҳоланган.

Шунингдек, ўзаро савдо-иқтисодий ҳамкорликни ривожлантириш, икки томонлама шартнома-ҳуқуқий базани мустаҳкамлаш, кўп томонлама ҳамкорлик йўналишида, хусусан, БМТ ва ЕХҲТ доирасида номзодлар ва ташаббусларни ўзаро қўллаб-қувватлаш каби мавжуд манфаатли шерикликни давом эттиришга ишонч билдирилган.

Ўзбекистон ва Сан-Марино ўртасидаги дипломатик муносабатлар 2021 йил 3 февралда ўрнатилган.

Абат Файзуллаев 2023 йил ноябрь ойидан буён Ўзбекистоннинг Италиядаги элчиси ва Римдаги халқаро ташкилотлар (ФАО, ҚХРХЖ, БООД) ҳузуридаги доимий вакили ҳамда 2024 йил декабрь ойидан бошлаб Ўзбекистоннинг Кипрдаги элчиси сифатида фаолият юритиб келмоқда.

2020-2023 йилларда Ўзбекистоннинг Австриядаги ва ўриндошлик асосида Венгриядаги элчиси сифатида ишлаган. У бир вақтнинг ўзида Ўзбекистоннинг Европада хавфсизлик ва ҳамкорлик ташкилоти ҳамда Венадаги бошқа халқаро ташкилотлар ҳузуридаги доимий вакили лавозимида фаолият олиб борган.