Қирғизистон президенти Садир Жапаров минтақадаги барча давлатлар чегара масалаларини ҳал қилганини маълум қилди. Бу ҳақда у ўзининг facebook саҳифасида ёзиб қолдирган.

«Бугун (13 март куни) Қирғизистон ва Тожикистон ўртасидаги 101 йил давомида (1924 йилдан бери) ҳал этилмаган чегара масаласи ниҳоят ҳал бўлди» – дейди президент.

Президент бу нафақат икки давлат, балки бутун Марказий Осиё минтақаси учун катта воқеа эканини таъкидлаган. У шунингдек, Марказий Осиё давлатлари бошқа давлатлар учун ягона – Шенген визасига ўхшаш умумий виза жорий қилиш керак, деб ҳисоблайди.

«Энди Марказий Осиё мамлакатлар ўзаро визасиз режим, бошқа давлатлардан келадиган меҳмонлар учун бўлса регионнинг барча мамлакатлари бўйлаб эркин ҳаракатланиш имконини берувчи ягона виза – Шенген визасининг аналогини жорий жараёнини бошлаши керак» – деб ёзади Президент.