Айни дамда Президент Шавкат Мирзиёев раислигида коррупциянинг олдини олиш бўйича ишлар натижадорлиги ва келгусидаги устувор вазифаларга бағишланган кенгайтирилган йиғилиш ўтказилмоқда. Унда мамлакатдаги коррупция холатларининг олдини олиш, унга қарши курашишга қаратилган тизимлар ва тегишли қонунлар муҳокама қилинди.

Президент бу борада қилинган ишларга баъзи мисолларни келтирди.

Қайд этилишича, давлат харидлари бўйича қонун қабул қилингани, танлов ва тендер рақамлашиб, соғлом рақобат бўлгани учун ўтган йили 14 триллион сўм бюджет маблағи тежалган.

"Фуқаролар кредит олиш учун кўплаб тўсиқ ва ғовларни енгиб ўтиши керак эди. Бугунга келиб барча банклар 100 миллион сўмгача маиший кредитларни инсон омилисиз 5 дақиқа ичида онлайн бермоқда. Натижада олдин бу иш билан шуғулланган минглаб банкирлар энди маҳаллага тушиб, одамларга лойиҳа, кредит таклиф қилиб, мижозини кўпайтириш устида ишлаяпти" – дейди Шавкат Мирзиёев. 

Президент шунингдек, одамлар боласини мактаб ёки боғчага жойлаштиришда сарсон бўлгани, ишини “бошқа йўллар” билан ҳал қилишга тўғри келганини эслатиб ўтди. Ўтган даврда мактабгача ва мактаб таълими тизимида 10 дан ортиқ хизмат турлари тўлиқ электрон шаклга ўтказилган. Тегишли мурожаатлар сони бўлса, 2,5 каррага камайган.

"Бундан 7-8 йил аввал олийгоҳларга ўқишга киришда “таниш-билишчилик” авж олган эди. Соҳа рақамлашди, имтиҳонлар онлайн трансляция бўлаяпти. Аввал тест топшириб, тўплаган баллига қараб, кейин олийгоҳни танлаш тизими жорий қилинди" – дейди Президент.

Шунингдек, олий таълимда 35 турдаги ҳужжатларни инсон омилисиз олишга ўтилгани учун соҳадаги мурожаатлар 2,2 баравар камайгани қайд этилди.