Италиялик машҳур олим, Леонардо да Винчи мероси бўйича таниқли мутахассис, дизайнер, рақамли санъат устаси Марио Тедди Ўзбекистондаги Ислом цивилизацияси марказига ташриф буюрди.

У марказнинг улуғворлигидан ҳайратда қолганини таъкидлади:

«Италиядаги учрашувимиз чоғида Ислом цивилизацияси маркази директори мени Ўзбекистонга таклиф қилди. Мен Марказ ҳақида тасаввурга эга эдим, лекин уни ўз кўзим билан кўриб, улуғворлиги ва гўзаллигидан ҳайратга тушдим. Айниқса, меъморий услуб, интерьер дизайни, ноёб равоқлар ва бадиий безаклар уни ислом цивилизацияси тарихидаги энг буюк маданий лойиҳалардан бирига айлантиради. Ишончим комилки, Ўзбекистон Президенти Шавкат Мирзиёев бошчилигидаги ушбу лойиҳа жаҳон миқёсидаги ўхшаши йўқ мегалойиҳага айланади», дейди италиялик олим.

Мутахассис Леонардо да Винчи шарқ олимларининг илмий меросидан илҳомланганини маълум қилар экан, бунга асосли далилларни келтиради:

«Бунга ишонмаслигингиз мумкин, аммо Леонардонинг энг буюк ихтироларидан баъзилари Беруний, Хоразмий, Фарғоний каби буюк ўзбек олимларининг асарларига асосланган. Мақсадимиз – ислом илм-фанининг Европа ривожланишига қандай таъсир кўрсатганини дунёга намойиш этиш ва бу кашфиётларни Ўзбекистондаги Ислом цивилизацияси марказига тақдим этиш. Мисол учун, Берунийнинг китобларида кейинчалик Леонардо да Винчи томонидан амалга оширилган кўплаб ғояларни топиш мумкин. Кўриниб турибдики, да Винчи қадимги математика ва геометрияни ўрганган ва бу бежиз эмас! Зеро, замонавий математика асослари айнан сизларнинг заминингизда дунёга келган. Бу халқингизнинг тарихий фахри ва биз бу кашфиётларни замонавий технологиялар ёрдамида жонлантириш ниятидамиз», дейди у.

Унинг қўшимча қилишича, Микеланжело ҳам ўзбек олимларининг илмий меросидан руҳланган.

Маълумот учун, Марио Тедди мультимедиа ва музей таълими бўйича етакчи мутахассис бўлиб, Миландаги Леонардо да Винчи фан ва технология музейлари лойиҳалари билан танилган. Бундан ташқари, дастурлаш, 3Д графикалар, видеоўйинлар, виртуал реаллик ва мультимедиа иловалари яратиш бўйича бир қатор ишларни амалга оширган. У Леонардо да Винчи мероси, қадимий технологиялар ва уларнинг замонавийликка таъсири бўйича таниқли тадқиқотчи ҳисобланади.

Хабарда ёзилишича, Марио Тедди учрашувда Ўзбекистонда етук ўзбек олимлари кашфиётларидан илҳомланган Леонардо да Винчига бағишланган кўргазма ташкил этишни режалаштирилгани ҳақида эслатиб ўтган.

Томонларнинг келишувига кўра, келгусида Ислом цивилизацияси марказида Беруний, Хоразмий ва бошқа буюк алломаларнинг асарлари Уйғониш даврига қандай таъсир кўрсатганини намойиш этиш мақсадида «Ўзбекистон буюк алломалари ва Микеланжело» экспозицияси ҳам ташкил этилади.

Шунингдек, учрашувда Ислом цивилизацияси маркази экспозициясини мультимедиа технологиялари ёрдамида бойитиш ҳамда ташриф буюрувчиларга ислом илм-фани ва санъати муҳитига чуқурроқ кириб бориш имконини берадиган рақамли музей экспозицияларини яратиш масалалари муҳокама қилинган.