«Оила ва гендер» илмий-тадқиқот институти Ўзбекистон ҳудудида ажрашишнинг сабаблари ва ажрашишдан кейинги ҳолатдаги оилаларга психологик тавсияларни келтириб ўтди.

Таъкидланишича, ажрашиш сабаблари психологик, иқтисодий, ижтимоий ёки маданий ҳолатлар билан боғлиқ бўлиши мумкин.

Қуйида Ўзбекистонда оилаларнинг ажрашиб кетишига сабаб бўлаётган айрим омиллар санаб ўтилган:

▪️ Ҳиссий алоқа етишмаслиги. Оила ичидаги ҳиссий ёндашув ёки севгининг сусайиши оиланинг асосий устуни бўлган ўзаро ҳурмат ва меҳрни камайтириши мумкин.

▪️ Иқтисодий қийинчиликлар. Ўзбекистонда ҳам бошқа давлатларда бўлгани каби иқтисодий қийинчиликларга дуч келиш ажрашишга сабаб бўлади.

▪️ Муносабатлардаги хиёнат ёки содиқлик муаммолари. Баъзида турмуш ўртоқларнинг бирининг хиёнати ёки ўзаро ишончсизлик ажрашишга сабаб бўлади.

▪️ Маданий ва ижтимоий босимлар. Ўзбекистонда оилалар кўпинча анъанавий роль ва кутишлар асосида ташкил топади. Бу турли омиллар, жумладан, оиладаги эркак ёки аёлнинг ҳақ-ҳуқуқлари ва мажбуриятлари тўғрисидаги тасаввурларни келтириб чиқаради.

▪️ Оилавий зўравонлик. Шахсий ва жисмоний зўравонлик муаммолари кўпинча ажрашишга олиб келади.

▪️ Мақсадлар ва ҳаётий йўналишлардаги фарқлар. Ўзаро фикрлар, мақсадлар ёки ҳаётга бўлган ёндашувлар ўртасидаги зиддиятлар ажрашишга сабаб бўлиши мумкин.

Шунингдек, мутахассислар ажрашиш ёқасида турган оилаларга турмушни сақлаб қолиш учун бир қатор маслаҳатларни бермоқда:

✅ Мулоқотни тиклаш – ажрашишнинг олдини олиш ҳамда оиладаги ҳар икки томон ўртасида очиқ ва самимий мулоқот қилиш учун зарур. Оиланинг ҳар бир аъзосининг ҳис-туйғулари ва эҳтиёжларини тинглаш, шунингдек, ўз фикрларини ифода этиши учун имкон яратиш жуда муҳим. Бу тушунмовчиликлар ва салбий ҳис-туйғуларни мулоқот орқали камайтириш мумкин.

✅ Тушунишга ҳаракат қилиш – ҳар бир томон бир-бирининг нуқтаи назарини тушунишга ҳаракат қилиши ва ўзаро ёрдамга тайёр бўлиши лозим. Бу ўзаро ҳурматни кучайтиради ва низоларни ҳал қилишни осонлаштиради.

✅ Ёрдам олиш – бундай жараёнларда оилавий маслаҳат ва психолог ёрдамидан фойдаланиш ҳам фойдали бўлади. Баъзан ташқи нуқтаи назар ҳам муҳим қарорлар қабул қилишда ёрдам беради.