Фото: Газета

2013 йил охирида Stack Exchange сайтининг математика форумида пайдо бўлиб, икки йил давомида мураккаб математик саволларга тўғри жавоб бериб келган Клео (Cleo) тахаллуси билан аталувчи фойдаланувчининг аллақачон форум фойдаланувчилари орасида афсонага айланиб улгурган. У ечим қандай келиб чиқишига изоҳ келтирмасди.

Ўша йиллари мазкур профиль маълумотларига фойдаланувчи аёл экани ҳақида тафсилот қўшилган эди.

2014−2015 йилларда форум иштирокчиларини ҳайратда қолдирган даҳо математик шундан сўнг ғойиб бўлган.

2015 йил бошида янгиланган маълумотларда профиль эгаси шундай ёзган эди(у ҳали ҳам ўзгаргани йўқ):

«Менинг ҳақиқий исмим Клео, аёл кишиман. Менда шундай касаллик борки, мунозараларда қатнашиш ёки узун жавоблар ёзиш менга қийинчилик туғдиради, бунинг учун мени маъзур тутинг. Мен математикани севаман ва бу сайтда, жавобларим ҳаммага ҳам фойдали бўлмаслиги мумкинлигини тушунган ҳолда, фойдам тегиши учун бор имкониятимни ишга соламан».

Форум иштирокчилари ўн йилдан ортиқ вақт давомида ушбу профиль ортида ким яширинганини аниқлашга уринди ва якунда (2025 йилнинг бошига келибгина) ҳисобни АҚШда истиқомат қилувчи ўзбекистонлик дастурчи Владимир Решетников яратгани маълум бўлди.

Хабарда ёзилишича, атиги икки йил ичида Клео мураккаб математик масалаларга 39 та жавоб эълон қилган, энг охиргиси эса — 2015 йил 31 декабрда.

Уларнинг барчаси тўғри ва тез берилган эди, лекин фойдаланувчи масалаларни қандай усулда ечганини тушунтирмаган. Баъзи ҳолларда жавобнинг тўғрилигини ҳамжамиятнинг бошқа аъзолари исботлаган.

Владимир Решетниковнинг сўзларига кўра, у 45 ёшда. Унинг GitHub'даги ҳисобида ҳавола қилинган LinkedIn профилида тўқсонинчи йиллар охирида Ўзбекистон Миллий университетида назарий физика йўналишида таҳсил олгани кўрсатилган. Решетников бир неча йил Тошкентда дастурий таъминот ишлаб чиқарувчиси бўлиб фаолият юритган, шундан сўнг аввалига Россияга, кейин эса АҚШга кўчиб ўтган. Унинг ҳозирги кундаги иш жойи кўрсатилмаган, лекин ўтмишда у турли вақтларда (жами саккиз йилдан ортиқ) Microsoft корпорациясида ишлаган. Шу жумладан, Клеонинг профили фаол бўлган даврда ҳам.

У нега сирли математик аёл образини яратишга қарор қилганини ўзининг саволлари ва муҳокама қилишни таклиф этган математик масалалари форум иштирокчиларининг эътиборини тортмаганлиги билан изоҳлаган.