Олий Мажлис юқори палатаси «фуқароларнинг виждон эркинлигини таъминлаш ва диний соҳадаги давлат сиёсати» концепциясини бир овоздан маъқуллади. Ҳужжат президент томонидан имзолангач кучга киради.

20 февраль куни Сенатнинг тўртинчи ялпи мажлисида «Ўзбекистон Республикасида фуқароларнинг виждон эркинлигини таъминлаш ва диний соҳадаги давлат сиёсати концепциясини тасдиқлаш тўғрисида»ги қонун кўриб чиқилди. Сенаторлар бир овоздан ушбу қонунни маъқуллади.

Маълум қилинишича, ушбу ҳужжат билан белгиланаётган асосий вазифаларнинг бажарилиши устидан парламент назоратини амалга ошириш мақсадида парламент комиссияси ташкил этилиши назарда тутилмоқда.

Маълумот учун, жорий йил 31 январь куни Олий Мажлис Қонунчилик палатаси томонидан ишлаб чиқилган «Фуқароларнинг виждон эркинлигини таъминлаш ва диний соҳадаги давлат сиёсати концепцияси» биринчи ўқишда концептуал жиҳатдан маъқулланиб, 9 февралга қадар жамоатчилик муҳокамасига қўйилганди.

Концепция лойиҳаси бўйича муҳокамаларда аҳолидан 400 тадан ортиқ изоҳлар, таклиф ва тавсиялар келиб тушган, уларнинг 200 дан ортиғи ижобий экани айтилган.

11 февраль куни бўлиб ўтган Олий Мажлис Қонунчилик палатасининг навбатдаги ялпи мажлисида мазкур қонун лойиҳаси ҳамда Концепция лойиҳаси иккинчи ва учинчи ўқишларда қабул қилинган.

Ҳужжат эндиликда президент томонидан имзолангач кучга киради.