Бугун “Jadid” газетасида чоп этилган сара мақолалар асосида тайёрланган “Tilda, fikrda, ishda birlik” китобининг тақдимот маросими бўлиб ўтди. Унда дипломатик корпус вакиллари, жадидшунос олимлар, атоқли адиб ва публицистлар, санъат намоёндалари, “Jadid” газетасининг фаол муаллифлари ҳамда кенг жамоатчилик вакиллари иштирок этди.

Анжуманда бир йил давомида газетада жадидшунос олимлар, зиёлилар, тадқиқотчи муаллифларининг таҳлилий-танқидий, ижтимоий-сиёсий мавзудаги материаллари эълон қилингани, “Tilda, fikrda, ishda birlik” китоби ана шу иш жараёнининг самараси, бошқача айтганда, 2024 йил сарҳисоби бўлгани таъкидланди.

Тақдимотда жадидлар ҳаёти ва фаолиятига бағишланган китоблар, тасвирий санъат асарлари кўргазмаси ҳам ташкил қилинди. Шунингдек, дастур давомида Ўзбекистон давлат драма театри репертуаридан жой олган “Туркистон болалари” спектаклидан парча йиғилганлар эътиборига ҳавола этилди. Тадбир якунида “Jadid” газетаси томонидан ўтказилган “Муштарийлар эътирофи” танлови ғолиблари тақдирланди.