Олий Мажлис Қонунчилик палатасининг Меҳнат, соғлиқни сақлаш ва ижтимоий масалалар қўмитасида нафақаларни тайинлаш ва тўлаш билан боғлиқ ишларни такомиллаштиришга қаратилган қонун лойиҳаси дастлабки тарзда кўриб чиқилди.

Мазкур қонун лойиҳаси билан пенсия олиш ёшига тўлган (эркаклар 60 ёш, аёллар 55 ёш) фуқароларга ёшга доир пенсиясини уларнинг алоҳида мурожаатини талаб этмаган ҳолда фуқаронинг иш стажи, иш ҳақи ва бошқа маълумотларини вазирлик ва идораларнинг ахборот тизимларидан олинган маълумотлар асосида бир кун муддатда проактив шаклда тайинлаш тартибини жорий этиш белгиланмоқда.

Қонун лойиҳасида, шунингдек, фуқаро пенсия ёшига етиб, аммо меҳнат фаолиятини давом эттириш истаги бўлганида проактив шаклда тайинланадиган ёшга доир пенсияни рад қилиш тартибини ҳам жорий этиш назарда тутилмоқда.

Маълумот учун, амалдаги тартибга кўра, фуқаролар белгиланган пенсия ёшига тўлганидан сўнг, пенсия тайинлашни сўраб яшаш жойидаги Пенсия жамғармаси бўлимига, Давлат хизматлари марказига ва Ягона интерактив давлат хизматлари порталидан рўйхатдан ўтиб, сўровномани тўлдирган ҳолда мурожаат қилади.

Қонун лойиҳаси сиёсий партиялар фракциялари муҳокамасига киритиш учун тайёрланмоқда.