«Оила ва гендер» илмий-тадқиқот институти оилани низодан сақлаш бўйича эътибор қаратиш лозим бўлган бир қатор жиҳатларни маълум қилди.

Таъкидланишича, оилавий низолар кўпинча қуйидаги сабаблар туфайли юзага келади:

▪️ Коммуникация муаммолари – Оила аъзолари ўртасида нотўғри ёки етарлича самарали мулоқотнинг йўқлиги низо чиқишига олиб келиши мумкин. Агар одамлар ўз фикрларини тўғри ифода эта олмаса ёки бир-бирларини тўлиқ тушунмаса, тушунмовчиликлар ва зиддиятлар юзага келади.

▪️ Ресурслар ва мажбуриятларни тақсимлашдаги келишмовчиликлар – Оила ичидаги молиявий, уй-жой ёки вақт ресурсларини тақсимлашда келишмовчиликлар, масалан, уй ишлари, болалар тарбияси ёки иқтисодий масалалар ҳақида келишмаслик оилавий низо сабабчиси бўлиши мумкин.

Мазкур келтирилган омиллар психологик кузатувлар билан исботланган.

Институт тадқиқотчиларининг таъкидланишича, бундай сабаблар биргаликда ёки алоҳида тарзда оиладаги муаммоларни келтириб чиқариши мумкин, лекин яхши мулоқот ва келишувлар бу масалаларни ҳал қилишда ёрдам беради.

Хабарда, шунингдек, оилавий низоларнинг олдини олиш учун баъзи психологик тавсиялар ҳам берилган:

▪️ Очиқ мулоқот – оила аъзолари ўртасида очиқ ва самимий суҳбатлар ўтказиш жуда муҳим;

▪️ Эмпатия(бошқаларнинг ҳис-туйғуларини тушуниш ва баҳам кўриш қобилияти)ни ривожлантириш – ҳар бир оила аъзоси бир-бирининг ҳис-туйғуларини тушунишга ҳаракат қилиши керак;

▪️ Қарорларни биргаликда қабул қилиш – Оила ичидаги қарорлар биргаликда, ҳамма аъзоларининг фикри инобатга олиниб, қабул қилиниши керак.

«Унутманг, ҳурмат ва тушуниш оила тинчлиги учун жуда муҳим», дейилади хабарда.