Россияда ҳайдовчилик қилиб юрган ўзбекистонлик йигит (Бахтиёр Исмоилов) қишки кийимсиз Москва вилоятининг Становоэ қишлоғи яқинидаги трассага чиқиб келган ўн бир ойлик чақалоқнинг ҳаётини сақлаб қолди.

Йигитнинг РEН ТВга сўзлаб беришича, у йўлда биринчи оқ нарсасини кўриб қолган ва бу нарса чақалоқ эканини хаёлига ҳам келтирмаган. Кейин дарҳол тўхтаб, болага ёрдам бериш мақсадида машинадан югуриб тушган ва қизалоқни машина ичига олган. Чунки чақалоқнинг кийимлари юпқа бўлиб, анча совқотган бўлган.

«У йиғлар эди. Унинг бармоқлари, юзи, бутун танаси музлаб қолган эди», дейди халоскор.

Йигит машинага мингач чақалоқни қалин ёпинчиққа ўраган ва улов печкасини ёқиб, қизчани иситиш учун қўлларини ишқалай бошлаган. Бу вақт оралиғида у полиция ва тез ёрдамни ҳам чақирган.

Орадан озроқ вақт ўтгач машинага бир аёл яқинлашган ва у чақалоқнинг бувиси эканини айтган. Йигит шундай бўлсада, болани аёлга бермай, ҳуқуқ-тартибот ходимлари ва шифокорларни кутишини билдирган.

Кейинчалик бу аёл ҳақиқатан ҳам чақалоқнинг қариндоши экани ойдинлашган. Хабарга кўра, у яқиндагина психиатрия бўлимида даволанишни якунлаган.

РEН ТВ маълум қилишича, тунда боланинг ота-онаси ухлаб ётган вақтда бувиси набирасини олиб уйдан чиқиб кетган.

Қўшимча қилинишича, қизалоққа биринчи даражали совуқ уриш ташхиси қўйилган. У ҳозирда уйида, амбулатор шароитда даволанмоқда.

Чақалоқнинг ота-онаси фарзандини қутқариб қолгани учун миннатдорчилик сифатида мукофот пули таклиф қилган, бироқ йигит пулни чақалоқнинг эҳтиёжларига сарфлаш яхшироқ эканини айтган.