UzAirways 20 январдан Европага Россияни четлаб уча бошлади. Бу Европа авиация хавфсизлиги агентлигининг (EASA) тавсиялари асосида ишлаб чиқилган.

Авиакомпания бошқаруви раиси Шуҳрат Худойқулов маълум қилишича, бу жараёнда Ҳаводаги ҳаракатни бошқариш маркази мутахассислари билан таҳлиллар ўтказилади, ҳаво ҳудудида содир бўладиган ҳолатлар юзасидан онлайн хабарнома (NATOM) чиқарилади ва экипажга кўрсатмалар берилади.

Ҳозирда авиақатновлар жануброқдан — Озарбайжон ва Истанбул орқали амалга оширилмоқда.

«Бу, албатта, ҳар бир парвозни 30−40 дақиқагача бир томонга кўпайтирди. Бу эса қўшимча харажат, дегани. Шунга қарамасдан, биз чипта нархларини ўзгартиришни қайта кўриб чиққанимиз йўқ. Чунки бу форс-мажор ҳолат ва бунинг учун йўловчи жавобгар бўлиши керак эмас», дейди у.