Бухоро ва Наманган вилоятларида давлат техника университетлари фаолияти йўлга қўйилади.

Уларга ҳудуддаги айрим институтлар қўшиб юборилади.

Жумладан, Бухоро муҳандислик-технология институти ҳамда Бухоро табиий ресурсларни бошқариш институти негизида Бухоро давлат техника университети ташкил этилади.

Муҳандислик, ишлаб чиқариш, озиқ-овқат технологияси, енгил саноат, нефть ва газ, яшил энергетика, архитектура ва қурилиш, транспорт ва логистика, агротехнология, ахборот технологиялари ва дастурлаш соҳалари бўйича, шунингдек, ҳудуднинг юқори малакали кадрларга бўлган эҳтиёжига мувофиқ олий маълумотли мутахассислар ҳамда илмий-педагогик кадрлар тайёрлаш университетнинг асосий вазифаларидан бири ҳисобланади.

ОТМда нефть ва газ муҳандислиги соҳасида Илғор муҳандислик мактаби фаолияти ҳам йўлга қўйилади.

2026 йил 1 январдан университетга академик, ташкилий ва молиявий мустақиллик берилади.

Наманган давлат техника университетига эса Наманган муҳандислик-технология институти, Наманган муҳандислик-қурилиш институти ва Наманган тўқимачилик саноати институти бириктирилади.

Янги олий ўқув юрти ҳам муҳандислик, қурилиш, тўқимачилик, ахборот технологиялари ва дастурлаш, ишлаб чиқариш, қайта ишлаш ҳамда хизмат кўрсатиш соҳалари бўйича, шунингдек, ҳудуднинг юқори малакали кадрларга бўлган эҳтиёжига мувофиқ олий маълумотли мутахассислар ҳамда илмий-педагогик кадрлар тайёрлайди.

Университетда юридик шахс мақомисиз Илғор муҳандислик мактаби фаолияти ташкил этилади.

2026/2027 ўқув йилигача Университетнинг камида иккита бакалавриат таълим йўналиши ва учта магистратура мутахассислигининг халқаро тан олинган ташкилотлар аккредитациясидан ўтказилиши таъминланади.

Наманган муҳандислик-технология институти, Наманган муҳандислик-қурилиш институти ҳамда Наманган тўқимачилик саноати институтида таҳсил олаётган барча талабалар ўқишини Университетда давом эттиради ва 2024/2025 ўқув йилидан бошлаб битирувчиларга белгиланган тартибда Университет дипломи берилади.

Маълумот учун, иккала ОТМга ҳам йирик ишлаб чиқариш корхоналари ва ташкилотлар саноат ҳамкори сифатида бириктирилади.