2025 йилда Маънавият ва маърифат маркази қошида «Маърифат» тарғиботчилар жамияти таркибида замонавий технологиялар, «IT» платформалар, мобил иловалар орқали аниқ мақсадга қаратилган ижтимоий лойиҳаларни амалга ошириш мақсадида «Лойиҳалар офиси» ташкил этилади. У Ижтимоий тадбирлар офиси, Рақамли ва дастурий тарғибот офиси, Тарғиботчилар фаолиятини мувофиқлаштириш офисидан иборат бўлади.

Ижтимоий тадбирлар офиси «Маърифат» тарғиботчилар жамиятининг йиллик иш режаси асосида ҳамда режадан ташқари тезкор маданий-маърифий тарғибот тадбирларини ташкил этади.

Шунингдек, анъанавий лойиҳалар, жумладан «Маънавият фестивали» ва «Ватан манзумаси» лойиҳаларини ташкил этиш бўйича янгиланган Дастур ва сценарийлар ишлаб чиқади.

Рақамли ва дастурий тарғибот офиси эса оммавий ахборот воситалари ва ижтимоий тармоқлар орқали жамиятнинг ахборий фаолиятини мувофиқлаштиришга масъул бўлади.

Шунингдек, ушбу офис «Маърифат зиё» платформаси фаолиятини ташкил этиш ва мувофиқлаштириш, маърифий йўналишга қаратилган оммавий онлайн тренинглар ва вебинарлар ташкил қилиш, сиёсий-маърифий ахборотларни тарқатиш бўйича «Рақамли саводхонликни ошириш» лойиҳасини амалга ошириш, ижтимоий роликлар ва видеоконтентлар тайёрлаш каби вазифаларни ҳам бажаради.

Тарғиботчилар фаолиятини мувофиқлаштириш офиси эса мамлакатизмиздаги фан-таълим, адабиёт, санъат ва маданият, соғлиқни сақлаш соҳаларидаги етакчи мутахассисларни аъзоликка қабул қилиш, уларни тарғибот ишларига сафарбар этишга масъул бўлади.

Шу билан бирга, у тарғиботчилар фаолиятини ташкил этиш ва мониторинг қилиш, тарғиботчиларнинг ижтимоий-маърифий муаммоларни ҳал этишга қаратилган таклифлари асосида креатив лойиҳалар ишлаб чиқиш ва уни амалиётга татбиқ қилиш, аҳоли вакиллари, ёшлар ўртасида самарали мулоқот ўрнатилишини таъминлаш, «Келажак лидерлари клуби» фаолиятини мувофиқлаштириш, Экспертлар Кенгаши фаолиятини ташкил қилиш ҳам Тарғиботчилар фаолиятини мувофиқлаштириш каби вазифаларни бажаради.