Ниғматилла Йўлдошев Ўзбекистон спорт курашлари ассоциацияси раҳбари бўлди.

Бугун Миллий Олимпия қўмитасида бўлиб ўтган Ўзбекистон спорт курашлари ассоциациясининг навбатдан ташқари ҳисобот-сайлов конференциясида янги номзод сайлангани маълум қилинди.

Йўлдошев номзоди Ассоциация Ижроия қўмитаси томонидан илгари сурилган бўлиб, йиғилиш иштирокчилари уни бир овоздан маъқуллаган.

Илгари бу лавозимда ишлаб келган Салим Абдувалиев эса лавозимидан озод қилинди.

Маълумот учун, Ниғматилла Йўлдошев Ўзбекистон Республика Бош прокурори, мамлакат кураш федерацияси раҳбари ҳисобланади. Эндиликда у Ўзбекистон спорт курашлари ассоциацияси раҳбари сифатида ҳам фаолият олиб боради.