2025 йил жаҳон тарихига яна бир янги авлод туғилиши бошланган йил сифатида киради. Гап шундаки, бу йилдан бошлаб инсониятнинг янги болалари – B (бета) авлоди дунёга келишни бошлайди.

Изоҳ учун, бундан олдинги, А (альфа) авлодининг охирги вакиллари 2024 йилнинг 31 декабрида таваллуд топди ва шу билан мазкур гуруҳнинг туғилиш жараёни ниҳоясига етди. Юнон алифбосига кўра А (альфа) ҳарфидан кейин B (бета) ҳарфи келади. Шунинг учун ҳам янги авлод гуруҳига B авлод деб ном берилган.

Австралиянинг McCrindle тадқиқот компанияси B авлод аъзолари 2025- ва 2039 йиллар оралиғида туғилишни маълум қилди. Мутахассисларнинг қўшимча қилишича, улар қарироқ бўлган Z (зет) ва ёшроқ бўлган Y авлоднинг фарзандлари ҳисобланади.

Янги замон вакиллари ўзларидан олдинги барча авлод вакилларидан ўзиб кетади. Масалан, А авлод аъзолари ақлли технология ва сунъий интеллектнинг дастлабки итерацияси билан танишган бўлса, B авлод болалари ҳаётнинг барча жабҳаларида сунъий интеллект ва автоматлаштиришни бошдан кечиради. Ачинарлиси, уларга катта ижтимоий муаммолар билан курашаётган дунё мерос бўлиб қолади.

«Иқлим ўзгариши, одамларнинг бир жойдан бошқасига кўчиши ва шиддат билан кетаётган урбанизация жараёнлари биргаликда қўшилганда барқарорлик нафақат афзаллик, балки умид ҳам бўлади. Бу авлод тенглик, мослашувчанлик ва экологик ҳушёрликни биринчи ўринга қўядиган Y ва қарироқ Z авлод вакиллари томонидан тарбияланади», дейди McCrindle тадқиқот компанияси ўз баёнотида.

Бундан ташқари, мутахассислар қарироқ Z авлод вакиллари тарбия жараёнида B авлодга мансуб фарзандларининг рақамли медиа билан бўладиган муносабатида эҳтиёткор бўлишини маълумот сифатида келтиради. Масалан, пайти келиб Y авлодга (30 фоиз) қараганда Z авлоднинг 36 фоиз вакили болаларнинг экранда ишлаш вақти чекланган бўлишини қатъий равишда хоҳлаб қолади.

B авлод 2035 йилда дунё аҳолисининг 16 фоизини ташкил қилиши кутилмоқда ва тахминларга кўра бу гуруҳнинг катта қисми XXII асрда яшайди. Чунки 2025 йилдан бошлаб туғилишни бошлайдиган инсониятнинг янги авлоди 2101 йилда 76 ёшга тўлган бўлади.

Маълумот учун, генетика бўйича бир авлоднинг йиллар бўйича гуруҳланиши қуйидагича:

▪️ Энг буюк авлод: 1901–1927 йиллар;

▪️ «Камгап» авлод: 1928–1945 йиллар;

▪️ «Baby Boomer» авлод(кўп чақалоқ дунёга келиш пайтида туғилганлар): 1946–1964 йиллар;

▪️ Х авлод(ёки 13-авлод): 1965–1979 йиллар;

▪️ Y авлод(миллениаллар): 1980–1994 йиллар;

▪️ Z авлоди(хоумлендерлар): 1995–2009 йиллар;

▪️ А авлод: 2010–2024 йиллар;

▪️ B авлод: 2025–2039 йиллар.