2025 йил 10 январь куни Буюк Британиянинг «HOPS» рекрутинг компанияси томонидан таклиф этилаётган мавсумий қишлоқ хўжалиги ишлари учун онлайн рўйхатдан ўтиш очилади.

Танлов қуйидаги босқичларда амалга оширилади:

1-босқич: Миграция агентлигининг веб-сайтида онлайн рўйхатдан ўтилади.

Бунда талабгордан ўзининг хорижга чиқиш фуқаролик паспорти ҳамда электрон почта (исм-фамилия чет элга чиқиш паспортидагидек бўлиши керак) манзили сўралади.

Онлайн рўйхатдан ўтиш кейинги танлов босқичларида иштирок этишни кафолатламайди. Танлов қарорлари «HOPS» томонидан қабул қилинади.

2-босқич: Онлайн тест синови «HOPS» оператори томонидан 2025 йил 14–15 январь кунлари ўтказилади. Тест маълумотлари фақат рўйхатдан ўтган ва танланган фуқароларга электрон почта орқали юборилади. Шу сабабли, бу босқичда талабгордан электрон почтасини диққат билан текшириши сўралади. Агар онлайн тест учун ҳавола олинмаган бўлса, танланмаганлик хулосаси берилади.

3-босқич: «HOPS» оператори вакиллари онлайн тест орқали танланган номзодлар билан боғланиб, офлайн суҳбат ўтказади ва келажакда амалга ошириладиган режалар бўйича қўшимча кўрсатмалар беради.

Бунда номзодлардан қуйидагилар талаб этилади:

▪️18 ёшдан кичик бўлмаслик;

▪️ рус тилини яхши билиш;

▪️қониқарли даражадаги жисмоний ва психологик ҳолат.

Меҳнат шароитлари:

▪️иш ҳақи соатига 11,44£;

▪️иш берувчи ҳафтасига камида 32 соат иш беришни кафолатлайди;

▪️виза тўлови 298 фунт стерлингни ташкил қилади;

▪️авиачипта нархи жорий тариф ва харид вақтига боғлиқ.

Рўйхатдан ўтиш учун ушбу манзилга кирилади. Биринчи босқич бугун, (Тошкент вақти билан) соат 15:00 дан 19:00 гача бўлган вақт оралиғида бўлиб ўтади.

Танлов тўлиқ «HOPS» оператори томонидан бепул амалга оширилади. Ўзбекистон Республикаси Вазирлар Маҳкамаси ҳузуридаги Миграция агентлиги бу жараёнда иштирок этмайди.

Миграция агентлиги танланган фуқароларнинг Буюк Британияга жўнаб кетишини кейинчалик ташкил этиш билан шуғулланади.

Агентлик Англияга пул эвазига мавсумий ишга юборишни таклиф қилаётган тижорат компаниялари ёки учинчи шахслардан огоҳ бўлишни сўрамоқда.