Иқтисодиёт ва молия вазирлиги 2025 йил учун «Очиқ буджет» порталида жамоатчилик иштирокида ўтказиладиган лойиҳалар тақвими эълон қилди.

Тақвимга кўра, январь ойида 2024−2025-ўқув йили учун «Менинг мактабим» лойиҳаси бўлиб ўтади. Овоз бериш 13−17 январь кунлари ўтказилади.

Лойиҳанинг 2025−2026-ўқув йили учун мавсуми октабр ойига мўлжалланган. Лойиҳаларни киритиш 1−10-октабрда, овоз бериш эса 21−30-октабр кунлари бўлади.

«Ташаббусли буджет»нинг биринчи мавсумига 1 февраль куни старт берилади. Овоз бериш жараёни 11 мартдан 20 мартгача давом этади, ғолиблари 21 март куни — Наврўз байрамида эълон қилинади.

Иккинчи мавсум эса 15 июлда бошланади. Ғолиб лойиҳалар 1-cентабр куни — Мустақиллик байрамида маълум бўлади.

«Менинг боғчам» лойиҳаси эса 1−10 июнь кунлари ўтказилади.

Иқтисодиёт ва молия вазирлигининг «Газета.уз»га маълум қилишича, «Менинг йўлим» лойиҳаси «Ташаббусли буджет»нинг биринчи мавсумига қўшиб ўтказилади.