Футбол мухлислари учун энг ишончли журналист ҳисобланадиган Фабризио Романо ўз саҳифасида Абдуқодир Ҳусановнинг атрофида кечаётган жараёнлар ҳақида ёзиб қолдирди.

Унинг таъкидлашича, «Манчестер Сити» «Ланс»нинг ўзбекистонлик марказий ҳимоячисини январдаги рўйхатига қўшган.

«Ўз позициясида энг яхши иқтидорлардан ҳисобланаётган 20 ёшли марказий ҳимоячига бир нечта топ клублар қизиқиш билдирмоқда. Пойга очиқ, »Манчестер Сити« вазиятдан хабардор», — деб ёзган инсайдер.

Бу ҳали ҳаммаси эмас. Ҳозирда жаҳоннинг энг кучли клуби сифатида таърифланаётган «Реал Мадрид» ҳам Ҳусановни сотиб олиши мумкин. Испан нашрларидан бири «Фичажес»нинг маълум қилишича, «Реал Мадрид»нинг олдидан турган муҳим масалалардан бири бу рақобатбардош марказий ҳимоячини таркибга қўшиш бўлиб қолмоқда. Шунинг учун ҳам клуб трансфер бозорида Карло Анчелотти жамоасини кучайтира оладиган футболчини изламоқда.

Мадрид клубининг бош скаут Хуни Калафатнинг диққат марказида эса 20 ёшли Абдуқодир Ҳусанов ҳам борлиги айтилмоқда. Эндиликда Ҳусановни сотиб олиш учун дунёнинг энг кучли «титан» клублари кураш олиб бориши мумкин.

Ҳусановга харидор бўлаётган жамоалар орасида, шунингдек, «Ювентус», «Интер», «Наполи», «ПСЖ», «Арсенал», «Манчестер Юнайтед», «Тоттенҳем», «Ньюкасл», «Баер», «Боруссия Д», «Ред Булл Лейпсиг» кабилар бор.

Қайси клуб бўлса ҳам, Ҳусанов бу йил «Ланс»ни тарк этади. Чунки буни клубнинг бош директори Пьерре Дреосси ҳам тасдиқлади.

«Ҳусанов кетади. Ҳозирча яхши таклифлар бўлмади... Агар у кетадиган бўлса ва таклиф етарли даражада қизиқарли бўлса, гап аввало иқтисодий баланс ҳақида боради», – деган у.