Янги йилда тиббиёт соҳасида бир қатор янгиликлар бўлади. Жумладан:

▪️ касалликлар профилактикаси ва эрта ташхис бўйича такомиллаштирилган дастурлар амалга оширилади ҳамда янги турдаги оммавий скрининг текширувлари йўлга қўйилади;

▪️ туман (шаҳар) шифохоналарида эса янги 220 та диагностика ва 488 та даволаш усули татбиқ қилинади;

▪️ Қорақалпоғистон Республикаси, Навоий, Самарқанд, Бухоро, Хоразм ва Қашқадарё вилоятларида давлат тиббий суғуртаси механизмлари жорий қилинади. 2026 йилда эса ушбу янгилик Сурхондарё, Фарғона, Андижон, Тошкент, Наманган ҳамда Жиззах вилоятларида татбиқ қилинади;

Ушбу ҳудудларда давлат томонидан аҳолига бепул кўрсатиладиган тиббий хизматлар ва дори воситалари кафолатланган пакети жорий этилади. Энг кўп учрайдиган касалликлар бўйича дори воситалари электрон рецепт асосида дорихоналар орқали бепул берилади.

▪️ тиббиётда натижага асосланган молиялаштириш усуллари татбиқ этилади. Кафолатланган тиббий хизматлар бюджет ҳисобидан амалга оширилади, бунинг учун аҳолидан қўшимча тўлов ундирилмайди;

▪️ барча даражадаги тиббий таълим тизимини тўлиқ трансформация қилиш, тиббиёт олий ўқув юртлари клиникалари фаолиятини такомиллаштириш орқали «илм-фан–таълим–малака ошириш–амалиёт» интеграциясини таъминлаш, билим ва касбий малакани баҳолаш тизимини халқаро стандартлар даражасида ташкил қилиш бўйича ислоҳотлар бошланади;

▪️ ўттиз минг нафар мутахассис Тошкентдаги тиббиёт марказларида, минг нафари хориждаги нуфузли клиникаларда ўз касбий маҳоратини оширади;

▪️ туркиялик мутахассислар томонидан бирламчи бўғин тиббиёт ходимларининг малака ошириш дастури такомиллаштирилади;

▪️ юқори технологик жарроҳлик ёрдами кўрсатиш сифатини янада ошириш мақсадида ихтисослаштирилган тиббиёт марказлари томонидан тегишли туман(шаҳар)лар намунавий ҳамда илғор ҳудудларга айлантирилади;

Энг асосийси эса, 2025 йилда соғлиқни сақлаш соҳасига 41 триллион сўм ажратилиши кўзда тутилган. Бунинг ҳисобидан янги шифохоналар ташкил этиш ва жиҳозлаш, мавжуд қувватларни кенгайтириш, тиббий кўрик қамровини кенгайтириш режалаштирилган.