23 декабрь куни, соат 12:24 да Тошкент вилояти Бўстонлиқ тумани Ихтисослашган кўп тармоқли бошқармасига Чахчам қишлоғи ҳудудидаги «Сурон ота» тоғида 5 нафар фуқаронинг адашиб қолгани ҳақида хабар келиб тушган.

Шунга асосан Чимён ёнғин-қутқарув отрядидан бир гуруҳ қутқарувчилар зудлик билан манзилга етиб борган ва олиб борилган қидирув-қутқарув ишлари натижасида фуқаролар соғ-саломат хавфсиз ҳудудга олиб тушилган. Уларнинг ҳеч бири тан жароҳати олмаган.

Маълум бўлишича, адашиб қолганлар тоғга сайр қилиш мақсадида чиққан ва якунда йўлдан адашган.