Олий таълим, фан ва инновациялар вазирлигида олий таълим муассасаларига ўқишга қабул қилиш ва давлат буюртмасини шакллантириш тизимини такомиллаштиришга бағишланган матбуот анжуманида олийгоҳ ҳамда коллеж ва техникумларга қабул қилиш имтиҳонлари «аввал тест, сўнг танлов» тамойили асосида ўтказилиши бўйича батафсил маълумот берилди.

Бунда абитуриентлар тестни 1 маротаба топширади ва тўплаган бали билан олийгоҳга кириш учун танловда қатнашади. Агар бали олийгоҳга етмай қолса, профессионал таълим ташкилотига кириш учун танловда иштирок этади.

Олийгоҳларга қабул жараёни 2 босқичда: олиб борилади:

1-босқич – рўйхатдан ўтиш ва тест фанларини танлаш;

2-босқич  – тест натижаси эълон қилингандан сўнг таълим йўналиши ва шаклини танлаш орқали амалга оширилади.