Кеча шимолий ҳудудларга, бугун Ўзбекистон ҳудудининг катта қисмига Волга бўйи ҳудудларидан нам ва совуқ ҳаво кириб келди. Республика бўйича баъзи жойларда ёмғир ёғади, айрим жойларда қорга айланиши мумкин. Қорақалпоғистонда, Хоразм вилоятида ва Фарғона водийси вилоятларида ёғингарчилик кутилмайди. Бу ҳақида “Ўзгидромет” хабар бермоқда.

14 декабрда циклон таъсири сақланиб туради, Бухоро, Навоий вилоятларида кечаси ва эрталаб, республиканинг қолган ҳудудларида кун давомида баъзи жойларда ёғингарчилик (ёмғир, қор) бўлади. Республиканинг шимолида ёғингарчилик кутилмайди. Ҳаво ҳарорати кечаси 1-3 даража совуққача, кундузи 3-5 даража илиқгача, республиканинг шимолида 7-12 даража совуқгача, кундузи 1-6 даража совуқгача пасаяди, ўртача кўп йиллик қийматлардан 4-6 даражага паст бўлади.

“15 декабрда республика бўйича ёғингарчиликсиз об-ҳаво кутилмоқда, фақат Фарғона водийси вилоятларида бироз қор ёғиши мумкин. Антициклоннинг совуқ периферияси таъсири ҳисобига кечаси ҳаво ҳарорати 4-6 даража совуққача пасаяди, кундузи 3-5 даража илиқ атрофида сақланиб туради”, дейилади хабарда.

Шунингдек, 16-17 декабрь кунларида антициклон таъсири аста-секин заифлашади, ёғингарчилик кутилмайди. Ҳаво ҳарорати кечалари 0-3 даража совуқни ташкил этади, кундуз кунлари 7-10 даража илиққача аста-секин кўтарилади. Республика бўйича баъзи жойларга туман тушиши мумкин.