«Олтин қалам» XVIII Миллий мукофоти учун халқаро танлов эълон қилинди, деб хабар берди ЎзА.

Танлов ОАВнинг бир нечта йўналиши бўйича ўтказилади.

Жумладан, телевидение йўналиши бўйича:

Энг яхши журналистик материал учун миллий мукофот (1-, 2-, 3-ўринлар);

Радио йўналиши бўйича:

Энг яхши журналистик материал учун миллий мукофот (1-,2-,3-ўринлар);

Босма нашрлар йўналиши бўйича:

Энг яхши журналистик материал учун миллий мукофот (1-, 2-, 3-ўринлар);

Интернет нашрлари йўналиши бўйича:

Энг яхши журналистик материал учун миллий мукофот (1-, 2-, 3-ўринлар).

Шунингдек, чет эллик журналистнинг Ўзбекистон ҳақидаги энг яхши материали учун – 1 та биринчи ўрин, 4 та иккинчи ўрин (ТВ, радио, босма ва интернет нашрлари йўналишлари бўйича).

Бундан ташқари, яна 12 та рағбатлантирувчи номинация жорий этилади. Танловнинг рағбатлантирувчи номинациялари бўйича қўшимча эълон берилади.

Танловда энг асосий соврин Бош миллий мукофотдир.

Ғолиб ва совриндорларга танловнинг бош соврини ҳамда эсдалик совғалари топширилади.

Хусусан, танлов Бош миллий мукофоти соҳибига махсус диплом, «Олтин қалам» статуэткаси ва енгил автомобиль тантанали равишда топширилади.

Шу қаторда:

▫️ Биринчи ўринни олган ғолиблар диплом, «Олтин қалам» статуэткаси ва базавий ҳисоблашнинг 200 баробари миқдорида пул мукофоти билан;

▫️ Иккинчи ўринни олган ғолиблар диплом, «Олтин қалам» статуэткаси ва базавий ҳисоблашнинг 175 баробари миқдорида пул мукофоти билан;

▫️ Учинчи ўринни олган ғолиблар диплом, «Олтин қалам» статуэткаси ва базавий ҳисоблашнинг 150 баробари миқдорида пул мукофоти билан;

▫️ Танловнинг рағбатлантирувчи номинациялари ғолиблари диплом, «Олтин қалам» статуэткаси ва базавий ҳисоблашнинг 100 баробари миқдорида пул мукофоти билан тақдирланади.

Маълумот учун, танловда иштирокчининг 2023 йил 31 мартдан 2024 йил 31 мартгача босма ва интернет нашрларида эълон қилинган, радио ва телевидениеда эфирга узатилган 5 тадан 7 тагача материаллари кўриб чиқилади. Агар ижодий жамоа – газета таҳририяти танловда қатнашадиган бўлса, газетанинг 5 тадан 7 тагача сонини, теле ёки радиоканал жамоаси танловда иштирок этадиган бўлса, 5 тадан 7 тагача энг яхши кўрсатув ёки энг яхши эшиттиришнинг электрон варианти (ёхуд ҳаволаси) илова қилинади.

«2023 йилда чоп этилган публицистик жанрдаги энг яхши китоб учун» рағбатлантирувчи номинацияси бўйича танловда қатнашиш истагида бўлганлар Ўзбекистон Журналистлар уюшмасига китобидан бир дона тақдим этади.

Танловга тақдим этиладиган ижодий ишларга қуйидаги ҳужжатлар ҳам илова қилинади:

▫️ муаллиф ва унинг профессионал фаолияти тўғрисидаги қисқача маълумот (объективка);

▫️ муаллифнинг паспорт ёки ID-карта нусхаси, телефон рақами;

▫️ Жамоавий иштирок этувчи ОАВнинг рўйхатдан ўтказилганини тасдиқловчи гувоҳнома нусхаси ва ташкилот раҳбарининг паспорт ёки ID-карта нусхаси.

Танловга ижодий ишлар Ўзбекистон Журналистлар уюшмаси ва унинг ҳудудий бўлимлари, Ўзбекистон Республикаси Ташқи ишлар вазирлиги кўмагида мамлакатимизнинг хорижий давлатлардаги ваколатхоналари орқали, шунингдек, муаллифлардан тўғридан-тўғри электрон шаклда танлов матбуотда эълон қилинган кундан бошлаб жорий йилнинг 5 апрелига қадар қабул қилинади.

▫️ Матбуот йўналиши бўйича ижодий ишлар газета ёки журналда эълон қилинган материалларнинг нусхаси (PDF форматда);

▫️ Интернет нашрлари бўйича материалларнинг ҳаволаси (линк, ссылкаси) кўрсатилган ҳолда;

▫️ телевидение бўйича видеоматериаллар (3 дақиқадан 30 дақиқагача Телеграм форматда (аннотацияси, қисқача мазмуни баёни билан);

▫️ радио йўналиши бўйича аудиоматериаллар (3 дақиқадан 30 дақиқагача, аннотацияси, қисқача мазмуни баёни билан);

▫️ Рағбатлантирувчи номинация – фотожурналистика бўйича ижодий ишлар (JPEG, TIFF ва PNG форматда аннотацияси, қисқача мазмуни баёни билан)белгиланган шаклда Ўзбекистон Журналистлар уюшмасининг 99-466-10-25 рақамига очилган (Ўзбекистон Журналистлар уюшмаси) Телеграми саҳифасига юборилиши сўралади.