20-октабр куни Ўзбекистон миллий Академик драма театрида ёзувчи Усмон Азим қаламига мансуб “Кундузсиз кечалар” пьесаси асосидаги спектаклнинг 800-намойиши бўлиб ўтди.

Намойишдан сўнг Республика Маънавият ва маърифат марказининг “Маърифат” тарғиботчилар жамияти томонидан Ўзбек миллий академик драма театрида 800 марта саҳналаштирилган спектакль ижодкорлари тақдирланди.

“Кундузсиз кечалар” пьесаси халқимизнинг севимли ёзувчиси Абдулҳамид Сулаймон ўғли Чўлпоннинг аччиқ тақдири, қатағон йилларининг таҳликали дамлари ҳамда ҳақиқат, адолат учун курашган ёзувчининг фожиаси ҳақида ҳикоя қилади. Ўз жонини сақлаш учун сотқинликдан ҳам тоймайдиган одамларнинг қиёфаси ҳам спектаклда кўрсатилган.

Мазкур спектаклнинг саҳналаштирувчи режиссёри Валихон Умаров, саҳналаштирувчи рассоми эса Ўзбекистон Республикаси санъат арбоби Бахтиёр Тўраевдир.