Қашқадарё вилоятида «Янги Ўзбекистон ёшлари, бирлашайлик!» шиори остидаги бўлиб ўтаётган ёшлар фестивали доирасида «Менинг фарзандим – Ўзбекистон фахри» лойиҳаси ғолиблари тақдирланди.

Республика Маънавият ва маърифат маркази ҳамда «Маърифат» тарғиботчилар жамияти томонидан ташкил этилган «Менинг фарзандим – Ўзбекистон фахри» лойиҳаси доирасида ҳар йили анъанавий тарзда спорт, санъат, илм-фанда юксак ютуқларни қўлга киритган ёшларнинг ота-оналари тақдирланиб келинмоқда.

Жорий йил ҳам Қашқадарёдаги 10 нафар ота-оналар ана шундай юксак эътирофга сазовор бўлишди.

«Қизим ёшлигидан спортга қизиқарди. Биз унинг қизиқишларини рағбатлантириб, спорт билан шуғилланиши учун шарт-шароит яратиб бердик, холос. Бугун эса қизимнинг ортидан мана шундай эътирофларга сазовор бўлиб юрибман», дейди енгил атлетика бўйича кўп карра Ўзбекистон ва Осиё чемпиони Барнохон Сайфуллаеванинг онаси Нигора Тўхтаева.