Самарқанд горнизонидаги ҳарбий хизматчиларнинг ахлоқий-руҳий ҳолати синовдан ўтказилди. Бу ҳақда Марказий ҳарбий округ матбуот хизмати хабар берди.

Хабарга кўра, Марказий ҳарбий округнинг Самарқанд гарнизонидаги ҳарбий қисм ҳарбий хизматчилари "Сазаган" дала-ўқув майдонидаги ахлоқий-руҳий тайёргарлик йўлагида машғулотлар ўтказган. Таъкидланишича, машғулотлар ахлоқий-руҳий тайёргарлик куни муносабати билан ўтказилган.

Ҳарбий хизматчиларнинг ушбу йўлакда оғир шароит ва тоғли ҳудудлардан ўтиш, табиий ва нотабиий тўсиқни енгиб ўтишда эпчиллик, ерости йўлагидан ўтиш давомида кутилмаган вазиятларга тайёр туриш каби хусусиятлар шакллантирилган. Шу билан бирга, уларнинг тезкорлик ҳамда чаққонлик, тез қарор қабул қила олиш қобилиятлари 15 га яқин тўсиқларда синалган.