Ижтимоий тармоқларда тарқалган Бўстонлиқ тумани Оқтош қишлоғида 53 туп кўп йиллик дарахтлар ноқонуний кесиб ташлангани ҳақидаги хабар юзасидан Тошкент вилояти Экология ва атроф-муҳитни муҳофаза қилиш бошқармаси ахборот хизмати расмий муносабат билдирди.

Қайд этилишича, ўрганиш ишлари натижасида 53 туп шумтол, 2 туп бақатерак, 1 туп қизил дўлана дарахтлари ноқонуний равишда кесилиб, ўсимлик дунёсига 288 млн 792 минг сўм миқдорда зарар етказилгани аниқланди.

Бош Прокуратура матбуот котиби Хаёт Шамсутдиновнинг хабар беришича, ҳолат юзасидан жиноят кодексининг 198-моддаси (Экинзорларни, ўрмонларни, дарахтларни ёки бошқа ўсимликларни шикастлантириш ёхуд нобуд қилиш) билан жиноят иши қўзғатилган.