Ҳиндистон ҳукумати «Док-1 МАКС» дорисини ишлаб чиқарган «Marion Biotech» компаниясига қарши суриштирув бошлаган.

Суриштирув Уттар-Прадеш штатидаги наркотикларни лицензиялаш ва назорат қилиш бошқармаси томонидан олиб бориляпти.

Улар Ўзбекистон ҳукуматидан ҳам вафот этган болалар ҳақида ҳисобот сўраган.

Компания ушбу сиропни ишлаб чиқаришни тўхтатгани айтилмоқда.

Эслатиб ўтамиз, аввалроқ ижтимоий тармоқларда Самарқанд вилояти болалар кўп тармоқли тиббиёт маркази директори М.Азизовнинг вилоят соғлиқни сақлаш бошқармаси бошлиғи Давронбек Жуманиёзовга ёзган хати нусхаси пайдо бўлганди, унда «Док-1 Макс» таблеткалари ва сиропини қабул қилган беморларда асоратлар юзага келгани ва ўлими ҳақида сўз борган.

Орадан вақт ўтиб, Болалар омбудсмани Самарқандда «Док-1 Макс» таблетка ва сиропларини истеъмол қилиши натижасида вафот этган болалар сони 18 нафарга етганини маълум қилганди. Беморлар Жиззах, Қашқадарё, Навоий ва Самарқанд вилоятларидан бўлган. Уларнинг барчаси 6 ёшгача бўлган.

Кейинчалик ССВ 18 нафар бола «Док-1 Макс» сиропини ичиб вафот этганини тасдиқлаган. Унинг таркибидан таркибида заҳарли модда — этиленгликоль топилган. Аниқланишича, дори шифокор рецептисиз, мустақил ёки фармацевт тавсияси билан сотиб олинган ва меъёрдан ортиқ дозада қабул қилинган. Ҳолат ўрганилгач, етти нафар масъул ишдан олинган. Дори савдоси эса тўхтатилган.

Шундан сўнг ДХХ Тергов бошқармаси томонидан 18 бола ўлимига сабабчи бўлган «Док-1 Макс» билан боғлиқ ҳолат бўйича Quramax medical ҳамда «Дори воситаларини стандартлаштириш илмий маркази» мансабдор шахсларига нисбатан жиноят иши қўзғатилган.

Ўзбекистон соғлиқни сақлаш вазири Беҳзод Мусаев эса сиропини қабул қилган болалар ўлими ҳақидаги маълумотлар вазирликдан яширилганини айтганди. У 18 нафар боланинг ота-онасига ҳамдардлик билдириб, узр сўраган.

29 декабрь куни Қашқадарёда яна бир бола «Док-1 Макс» сабаб вафот этди ва препарат қурбонлари сони 19 нафарга етди.

Мавзуга доир: Дорида заҳарли модда борлиги нега 18 бола ўлгунича аниқланмаган? Шуни аниқлашга масъул бўлган масъул ким? Шу масъулнинг устидаги масъулчи? – фаоллар кўрилган чоралардан қониқмаяпти