250 та уй-жой мулкдорлар ширкатлари томонидан 20 млрд сўм маблағлар талон-тарож қилинган, 50 га яқин ширкат раҳбарига жиноий иш қўзғатилган. Бу ҳақда АОКАда ўтказилган брифингда Уй-жой фонди инспекцияси раҳбари Азлар Содиқов маълум қилди.

Унга кўра, кўп квартирали уйлар ва унга туташ ҳудудларда жами 11 778 та ноқонуний қурилмалар аниқланган бўлиб шулардан, 3 500 тасига 6,0 млрд.сўм маъмурий жарималар қўлланилган ҳамда 6 800 таси мулкдорларнинг ўзлари томонидан аввалги ҳолатига қайтарилган.

Шунингдек, кўп квартирали уйларга хизмат кўрсатувчи жами 1000 га яқин бошқарув органлари фаолияти ўрганилган. Натижаларга кўра 250 та уй-жой мулкдорлар ширкатлари томонидан жами 20 млрд.сўм маблағларни талон-тарож ёки уй-жой мулкдорларига зарар етказганлиги аниқланди. Шундан, 50 га яқин ширкат раҳбарларига нисбатан жиноий ишлар қўзғатилиб 700 млн.сўмга яқин маблағлар ширкатлар ҳисобига қайтарилган.

Кўп квартирали уйлар ва уларга тегишли туташ ҳудудларда олиб борилган таъмирлаш-тиклаш ишлари ўрганилганда эса жами қиймати 14 млрд.сўм миқдорда 57 та қонун бузилиш ҳолатлари аниқланган. Ҳозирда пудрат ташкилотларига нисбатан жиноий ишлар қўзғатилган.