Қарши давлат университети талабаси вилоят ҳокими Муроджон Азимов билан учрашувда билдирилаётган ноўрин танқидларга жавоб қайтарувчи блогерлар жамоасини тузиш таклифини берди. Вилоят ҳокими бу таклифни маъқуллаб, талаба қиз ҳокимликка ишга олинишини билдирди.

Талаба қиз АОКАнинг вилоят бошқармаси ҳузурида жамоани шакллантириш, бу орқали вилоят имижини яхшилаш мумкинлиги ҳақида гапирган.

«Ахборот ва оммавий коммуникациялар агентлигининг вилоят бошқармаси ҳузурида ҳар бир туманда олий таълим муассасалари талабаларининг кўнгилли ёшларидан ташкил топган ёш блогерлар жамоасини шакллантириш ва уларни керакли техник жиҳозлар билан таъминлаш, мунтазам ўқув-семинарларни ташкил этишни таклиф қиламан.

 

Бундан кўзланган асосий мақсад нима? Юртимизда, айниқса, Қашқадарё вилоятида олиб борилаётган ижобий ўзгаришларни кенг халқ оммасига тарғиб қилиш бўлади. Қўштирноқ ичидаги айрим блогерлар томонидан танқидий масалаларга баъзи ҳолатларда нотўғри томонлама ёндашилаётгани вилоятимизнинг баъзи жойларида, ўзингиз айтганингиздек, бизни хафа қиладиган даражага етказяпти.

 

Биз шундай жамоа шакллантирайликки, 100 та оқ нарсани кўрсатмасдан, битта қора нарсани кўрсатаётганлар учун ижобий жавоб қайтарсин», — деган талаба қиз.

 

Вилоят ҳокими Муроджон Азимов эса бу таклифни эшитиб, талаба ҳокимликка ишга олинишини маълум қилди. Ушбу таклиф янграган видео университет телеграм каналига жойланди.

Ушбу ҳолат ижтимоий тармоқларда кўплаб муҳокамаларга сабаб бўлгач, вилоят ҳокимлиги матбуот котиби Аҳрор Содиқов унга қуйидагича изоҳ берди.

«Қизнинг таклифига эътибор берсангиз, «АОКА вилоят бошқармаси қошида ташкил этсак», деган жумлалар бор. Бу таклиф, холос.

 

Талаба ишга қабул қилинган тақдирда ҳам лавозими доирасидаги ишни олиб боради. Масалан, ҳокимликнинг ижтимоий бўлимига ишга ўтса, таълим ва соғлиқни сақлаш соҳасида, туризм бўлимига ишга ўтса, туризм соҳасини ривожлантириш борасида иш олиб боради», — деган Аҳрор Содиқов.