Россиянинг «Аэрофлот» авиакомпанияси Санкт-Петербург—Тошкент ва Санкт-Петербург—Самарқанд йўналишлари бўйича мунтазам парвозларни йўлга қўяди.

Uzbekistan Airports хабарига кўра, Санкт-Петербургдан Тошкентга биринчи йўловчи рейси 17 декабрга белгиланган. Парвозлар Boeing-738 самолётларида ҳафтасига уч марта — чоршанба, жума ва якшанба кунлари амалга оширилади.

Санкт-Петербургдан Самарқандга рейслар ҳам ҳафтасига уч марта — сешанба, пайшанба ва шанба кунлари Boeing-738 самолётларида амалга оширилади. Биринчи парвоз 16 декабрь куни амалга оширилиши режалаштирилган эди. Аммо рейс 2022 йил 16 декабрдан 20 декабрга кўчирилди.

«Аэрофлот — Россия ҳаво йўллари» штаб-квартираси Москвада жойлашган Россиянинг давлат-хусусий авиакомпаниясидир. «Аэрофлот» гуруҳига, шунингдек, «Россия» авиакомпанияси ва «Победа» лоукостер авиакомпаниялари киради.

Шунингдек, Эроннинг «Qeshm Air» авиакомпанияси ҳам Теҳрондан Ўзбекистоннинг икки шаҳри — Тошкент ва Самарқандга рейсларни йўлга қўйишни режалаштирган.

22 декабрдан Теҳрон — Тошкент — Олма-Ота — Теҳрон ва Теҳрон — Самарқанд — Теҳрон йўналишларида тўғридан-тўғри мунтазам қатновлар йўлга қўйилмоқда. Парвозлар Airbus 320 самолётларида, дастлаб ҳафтасига бир марта амалга оширилади. Кейинчалик йўловчилар томонидан йўналиш ижобий қабул қилинса, рейслар сонини кўпайтириш режалаштирилмоқда.