Куз-қиш мавсумида об-ҳавонинг совуши сабабли айрим ҳудудларда метан газ қуйиш шохобчаларига чекловлар киритиш тўғрисида хабар берилганди. Монополияга қарши курашиш қўмитасининг маълум қилишича, юқоридаги ҳолат автомобилларга газ қуйиш шохобчалари томонидан метан гази нархларининг ошишига сабаб бўла олмайди.

Ўз навбатида, қўмита томонидан метан газ нархлари доимий мониторинг қилиб борилаётгани ва тадбиркорлар томонидан автомобилларга газ қуйиш шохобчаларида метан гази нархларини сунъий равишда ошириш ҳолати аниқланган тақдирда мансабдор шахсларга белгиланган тартибда тегишли чора кўрилиши маълум қилинди.

«Бу борада Монополияга қарши курашиш қўмитаси томонидан барча ҳудудий бошқармаларига аниқ топшириқлар берилган ва улар томонидан назорат ишлари олиб борилаётганлиги тўғрисида огоҳлантирамиз», – дея якунланади қўмита хабари.