Президентимиз Шавкат Мирзиёев раислигида 2021 йил 19 январь куни ўтказилган маънавий-маърифий ишлар тизимини тубдан такомиллаштириш, бу борада давлат ва жамоат ташкилотлари ҳамкорлигини кучайтириш масалалари бўйича видеоселектор йиғилишида ҳудудлар марказида намунавий лойиҳа асосида маънавият ва маърифат масканларини барпо этиш юзасидан кўрсатма берилган эди. Бу борада тасдиқланган тегишли қарор асосида эса 2021-2023 йилларда барпо этиладиган масканлар манзилли рўйхати тасдиқланди. 

Фарғона вилоятида ўтган давр мобайнида 9  та ҳудудда замонавий Маънавият ва маърифат масканлари ташкил этилди. Шуни алоҳида таъкидлаб ўтиш керакки, Фурқат туманида ҳам ана шундай маскан фойдаланишга топширилди.

Масканда турли танловлар, маънавий-маърифий тадбирлар, ижодий учрашувлар, китоб тақдимотлари ўтказиш учун барча шароитлар яратилган. ижодий-маданий масалалар бўйича тарғиботчилар, ижодкорлар учун хона ажратилган. 

Маънавият масканининг очилиш маросимида вилоят ҳокими ўринбосари Файзулло Қосимов, туман ҳокими Жаҳонгир Жуманов, Республика Маънавият ва маърифат маркази Фарғона вилояти бўлими раҳбари Маъсуджон Сулаймонов, фахрий устозлар, ёшлар, зиёлилар, кенг жамоатчилик вакиллари иштирок этди.

Тадбирда бу каби қулайлик ва имкониятлар маънавий-маърифий соҳани янги босқичга олиб чиқиши, ижодкор ёшлар учун мулоқот майдони бўлиши таъкидланди.